لاشك ان العلاقات الاقتصادية لها طابع تأثير شديد الحساسية فى العلاقات السياسية مما يولد تأثر للوزار و بعضهم البعض
و هذا هو ماحدث تماما عندما باعت شركة موبينيل المصرية شبكتها القديمة لدولة شونجونجو الشقيقة لم اعد أرى اختلافا بين وزراء الدولتين
كنت قاعد بأقلب فى القنوات لقيت قناة الجزيرة بتذيع على لسان الوزير الفنان أحمد ابو الغيط فى مؤتمر صحفى فى ايطاليا صرح فيه سيادته أن قوات الامن المصرية قد تغلبت بفضل الله و كفاءة أسودها الرجال على المختطفين فى المنطقة ما بين مصر و السودان انا بينى و بينكم فرحت بس فيه حاجة غريبة قوى ظهرت لقيت كل يوم على كل القنوات ( الغير مصرية ) تصريح من ايطاليا مثلا ان الرهائن لسة تحت الحصار و ان لم يتوصلوا لحل أكيد دلوقتى و شوية كدة قناة المانية أرسلت للجزيرة تقرير ان الالمان لسة هناك و ان الناس الوحشين الشريرين طالبين فدية كبيرة ( بينى و بينكم انا زعلت جدا من الناس دول وقلت فى سرى ياكدابين يا اعداء النجاح ليه كل الظلم ده و لما ذاعت جميع القنوات المحلية و الدولية يوم الاثتنين الموافق 29 سبتمبر ان المصريين قدروا يخلصوا الرهائن قلت أكيد أكيد الجماعة بتوع القنوات فى العالم كله قاموا بتأجيل اذاعة الخبر العظيم ده لاسباب فنية بحته منها مثلا انشغال القنوات فى كل الاوقات بسبب الضغط الاعلانى الفظيع عليها
و لما الوزير الفنان أمين أباظة وزير الزراعة صرح ان الدولة قد أخذت 2 مليون فدان فى أوغندا لزراعتها قمحا و ذلك لتحسين مستوى الرغيف المصرى بينى و بينكم فرحت جدا وقعدت بقى أحلم بالرغيف الاوغندى و قد ايه قمح كامبالا جميل
و بعدين فجأة لقيت وزير خارجية أوغندا بيصرح للعالم كله ان زيارة المصريين لاوغندا كانت زيارة ودية جدا و ان الجماعة مش اتكلموا خالص فى موضوع الزراعة استغربت جدا من كدب الراجل ( أصل مش معقولة أمين اباظة هيكدب ده اسمه كلام ؟؟!!! ) وقعدت أحط احتمالات تفتكر يا ابو أحميد يكون وزير الخارجية عاوز يضرب ايجار الارض فى جيبه ؟؟ جايز
و اخيرا تصريح جميل جدا للوزير الفنان فاروق حسنى بيقول ايه ؟؟ ان كوبرى الازهر هو السبب فى حريق
"" المرسح الجومى "" الشهير بالمسرح القومى بينى و بينكم انا اقتنعت بكلامه و اؤيده بشده خصوصا ان كوبرى الازهر مش أول مرة يعملها مرة حرق قصر ثقافة بنى سويف و انا شخصيا عمل معايا مقفين مش قادر انساهم مرة حرق صنية بطاطس لامى فى البيت ومرة تسبب عمدا فى حرق بنطلونى و انا بأكويه
أخير انى داع فأمنوا
اللهم احفظ لنا نعمة الوزراء .... امين
